معلهش يا ام نبوية الرجال سيغة وقت ما تعوزيها تلاقيها، يعاودوا تبقى أشيتهم معدن، بس اصبري لما نخلص من العرض
انتي رحتي وقلتي عِدُّوا لي، هوّ العيش والملح مالوش حق؟
ما نستغناش يا حبيبتي هيَّ العين تعلا على الحاجب يا ست حنيفة، بس انا كنت مشغولة شوية بنبني محلّين في الدور التاني بلكي الولد يجّوز يبقى يدخل هناك.
إنتي كنتي ديك اليوم بتشكي من الفقر وغلبك من الرجل ورايحة تبني والّا تجوّزي منين؟!
عقبال عندك يا اختي، إن شاء الله اشوفك وانتي متهنية زيّ ما ربّنا هنّاني، الافندي بتاعنا ما تاب عن المخسوف العرقي وطهّر هدومه والتفت لعبادته، ازَّاي يا اختي ما تلاقي اللي كان بيروح منّه كلّ شهر اتناعشر جنيه كانوا بيروحوا في طريق الشيطان الرجيم ودلوقت ما احلاه يا اختي وما احلى قرايته في الفجر، حسّه يلعلع في القراية تقوليش الّا كروان، وياما يقوم بالليل يا ست حنيفة ويعيّط ويرمي من كل عين حفان ويقول ضيّعت شبابي ومالي في الفارغة، أنا كنت مجنون أفوت اولادي عرايا جيعانين واروح احطّ فلوسي في الخمرة، ينعل الخمرة واللي علّمونا شرب الخمرة واللي بيشربوا الخمرة، اتنا عشر جنيه كلّ شهر وبقى لي خمسة عشر سنة أشرب الملعونة دي يبقى صرفت الفين وميه وستين جنيه، لو كنت اشتريت بهم أطيان من أطيان الميري اللي الفدان بعشرة جنيه كنت اشتريت ميتين وستة عشر فدان وسنة يصلّحوا ويبقوا أبعادية، والّا كنت اشتريت بهم بيتين تلاتة للأجرة وكنت صيّغت البنات وجدّدت البيت، ألّا زيّ اللي الوعد غطَّا عليه، طاوعت الخنزير جارنا ومشيت ويَّاه في قلة القيمة لمّا صبحني في آخر الناس، قُطعِت الخمرة واللي يشربوا الخمرة.
وقلت له بقي يا سيدي ما بقيتش تشرب الخمرة أبدًا؟ فقال انا اشربها يا امّ نبويّة مرّة تانية؟! أعوذ بالله، إن شا الله اللي يشرب الخمرة من الناس اللي دايرين في الخمارات ما يشرب الّا السمّ الهاري، شوفي الناس الأمرا والخواجات الواحد منهم يقعد على السفرة ياخد كاس واحد نبيت ونصُّه ميّه، واحنا نروح نشرب زيّ البهيم المحمور اللي يفضل يشرب لما يفرتك جوفه، الله يتوب على اخوانّا وينقذهم من الضلال اللي همّ فيه.
وقلت له مرَّة، أظن يا سيدي لمّا كنت بتشرب ما كنتش تصلّي ولا تتحّي، فقال لي طيب اسكتي هوَّ السكران يصلّي والّا يهبّب؟! لمّا تبقى هدومه نجسة وجتته نجسة، ويقف يشخّ ويطرطش على هدومه، ويمكن لمّا يسكر يمزّ بلحم خنزير، يبقى اللي زي دا له صلا والّا عبادة، آهو زيّ الحمار والّا الكلب اللي يشخّ على روحه، حتّى الحمار لمّا ييجي يشخّ يفرشح رجليه خايف من الطرطشة، والكلب يشيل رجله ودا لا يخاف ولا يُسأَل.
وقال لي دا يمكن السكران من دول يقعد طول الليل ويقول في كلام كفر ولا يدري باللي يقوله، على إيه، اعرفي إنّ السكران خيّ المجنون، إن كان المجنون يعرف بيقول إيه، يبقى السكران يعرف نفسه والّا يعرف يشخ ازاي.
وتقولي يا ستّ حنيفة الراجل وشّه نوّر وراح لك بياضه زيّ اللبن ودي العينين اللي كانت زي عينين النسناس ازّاي ما ادوّرت وبقت حلاوة الدنيا يا اختي، والّا دي الورد اللي بقى على خدوده تقولي انّه رجع ابن عشرين سنة.
ولمّا كان بيسكر كان عدوّك، وشّه زيّ وش القرد، ويجيني مبلّم زيّ الطور ما يعرف يتكلّم، وافضل أشيل فيه واحطّ فيه، وهو تقولي ميّت والا قتيل، يا ما شفت يا اختي وياما ورَّاني، ولكن الله يسامحه ويبري ذمته من جهتي، وربنا يكفيه شرّ اولاد الحرام.
عقبالي عقبالي، اللّي عطاكي يعطيني يا ام نبويّة، راحت فين امّ جرجس تيجي تسمع الكلام اللي زيّ الشهد ده، يا عيني عليها اللي مسكها المعلم غطّاس ديك الليلة وفضل يا عيني يدّبها ويرزع فيها لمّا راح منه حيل وجا حيل وهيّ يا عيني زي الرِّجل الخدلانة، لا تهشّ ولا تنشّ، الّا قاعدة تمسح في دموعها وهوَّ نازل لا يستحي ولا ينقرع، آه يا ناري يا اختي لو كنت لحقته وهوَّ بيضرب فيها والنبي والنبي ما كنت إلا ادّي له لمّا اخليه حواليه كيمان.
دول رجّالة بقوا هَمّ خالص، وصدق اللي قال جيزة نصارى ما فراق إلا بالموت، تلاقيها يا عيني رايحة تعمى من كتر العياط والراجل ما هو سائل، لو كان ربنا يجيب للسكارى داهية ونستريح منهم.
ما كنّا كتبنا عرض حال لهم، جرى فيه أيه؟
هو انتي ما سمعتيش؟ ما كتبوا عليه (ط) يعني بطّال؟ والنبي لو كان العرض حال دا انكتب لناس في وشهم دمّ ما كانوا الّا ضربوا نفسهم بالجزم، الا دا احنا بننفخ في قربة مقطوعة، ربّنا يخلّي الأستاذ، أهو بيعشّمنا بإنّهم يتوبوا، شوفي يا يكون زي وعد الكمّون يا ربنا يتوب عليهم، وادي احنا كتبنا للنديم يكتب لنا عرض حال عن لسان الاولاد إياك يحنّ قلب ابوهم عليهم، وان ما نفعش نكتب عن لسان الجيران، وبعدين عن لسان الحيطان، وبعدين عن لسان السما، وبعدين عن لسان الملايكة، وان مانفعش دا كله وحياة النبي ما احنا الّا مورّيينهم السير يطلع منين.
همّ بيخوفونا بالطلاق؟! ولكن رايحين يطلّقوا كام ألف مرا وكمان لمّا يطلّقونا مين ياخد الأندال زي دول بعد ما يفوتوا اللي طول عمرهم يخدموهم وصابرين على غلبهم؟ بكره تشوفي إن ما كنا نخلّي الراجل من دول يمشي على العجين ما يلخبطه، ابقي قولي اللي تقوليه.
أنا بلغني يا خيّة ان أمّ حنين فرحانة اكمن جوزها تاب زي جوزي.
برضه أنا سمعت ان تادرس افندي تاب ومشي في حاله وبطّل كل الأمور الكدّابة، عقبى للباقي نصبح نلاقيهم عقلم وبقوا زيّ الرجالة.
يا صبر الأستاذ يا اختي على كلام السكارى وشتيمتهم، وكلّ ما يبلُغه عنهم كلامهم يزيدهم ولا يزعل ولا ينحمق، ولا كإنّهم كلاب بيهبهبوا عليه، والنبي لولا ربنا رزق النسوان بالأستاذ وداير يدوّر لهم على مصلحة رجالهم ويورّيهم طريق التوبة، ألّا كان الحال يزيد يوم في يوم لمّا تبقى الخمّارات بدل البيوت وتصبح النسوان بَلا رجالة.
إحنا ما نقطعشي العشم، برضه نفضل ورا الرجّالة بالكلام الطيب شوية والردي شوية، واهو الأستاذ موش مخلّي وراه ورا، وخد من التل يختلّ، لمّا ربّنا يصلح حالهم ويفوقوا لنفسهم، معلهش يا ام نبوية الرجال سيغة وقت ما تعوزيها تلاقيها، يعاودوا تبقى أشيتهم معدن، بس اصبري لما نخلص من العرض حالات وتشوفي بكره الحكومة تعمل لهم رابطة وتحطّ على مستخدمينها بصّاصين احسن ما يخرب عقلهم ولا يعرفوا يكتبوا ولا يعرفوا يحسبوا.
هما ما هماش سامعين اللي بيقولوا ما فيش في مصر رجال لمّا يشوفوهم صفوف صفوف في البِيَر والخمارات؟! حدّش رايح يشوف الناس الامرا والعقلا اللي قاعدين في بيوتهم ما تطلع منهم العيبة ولا عمرهم يقلّوا عقلهم ويشربوا العرقي والّا يقعدوا في السكّة زيّ الناس الهمّ دول؟!
ويا ما ناس يا امّ نبويّة تلاقيهم قاعدين على القهاوي يشمّوا الهوا ويشوفوا بعض ويسألون بعض عن الأخبار والواحد منهم قاعد يشرب شيشة والّا قهوة والّا شربات والا ياكل له حتّة حلاوة وقاعدين يتفرجوا على السكارى زي ما يتفرجوا على القرداتي، ولكن معلهشي، يا ما يجري على الرجالة ويرجعوا يتوبوا وينصِلِح حالهم.
خلّيتك بعافية يا اختي.
ما هو بدري، خليكي موانسانا شويّة.
ربّنا يبارك فيك يا اختي أحسن ورايا العجين.
الله يعافيكي يا اختي، ابقي ودّي يا امّ نبويّة كل كام يوم احسن الواحدة بتشّوّق لِك.
ربّنا يبارك فيكي يا اختي، إن شاء الله ما تشّوّقي إلا للنبي وانتي متهنّيّة على اولادك.
إن شاء الله، ونكون سوا، والله حبيبة يا امّ نبويّة، إن شاء الله عمري ما اعدمك.
سجل معنا للنشرة البريدية
© 2025 جميع الحقوق محفوظة لجبرديات
